जनकपुरधाम  । हिन्दूहरूको आस्थाको केन्द्र हो, जनकपुरधाम । रामजानकी मन्दिरको धार्मिक महत्त्वले मात्रै होइन, यसको सौन्दर्यकरणले पनि सबैको ध्यान तान्छ । तर सोही सौन्दर्यकरणको नाममा करोडौंको भ्रष्टाचार भएको पाइएको छ ।

महालेखा परीक्षकको मधेस प्रदेशले सार्वजनिक गरेको चौथो वार्षिक प्रतिवेदनले जानकी मन्दिर प्रांगणमा मापदण्डविपरीतका गुणस्तरहीन मार्बल प्रयोग गरेको र त्यहाँ करोडौंको अनियमितता भएको उल्लेख छ ।

महालेखाका अनुसार, पुरातत्व विभाग केन्द्रीय कार्यालय र गुठी संस्थान केन्द्रीय कार्यालयले जानकी मन्दिरमा सुझाएको मार्बल र टाइल्सभन्दा फरक कम मूल्यका सामग्री लगाएको पाइएको छ । मन्दिर परिसरमा विभिन्न रंग मार्बल बिछ्याउने सम्झौता भएकोमा पुरातत्व विभागले सेतो रंगको मार्बल मात्र प्रयोग गर्न भनेको थियो । यो विषयमा मुख्यमन्त्रीबाट सैद्धान्तिक सहमति भए पनि काम गर्दा सहमतिलाई लत्याएको पाइएको छ । आजको अन्नपूर्ण पोस्ट् दैनिकमा खबर छ ।