काठमाडौं (एजेन्सी) । भारतको उत्तर प्रदेशको बाराबंकी जिल्लामा दुई यात्रुवाहक बस आपसमा ठोक्किएर दुर्घटना हुँदा आठ यात्रुको मृत्यु भएको छ । १२ जनाभन्दा बढी घाइते छन् ।

जानकारी अनुसार, बिहारको दरभंगाको लोखा सहरबाट करिब ५० यात्रु लिएर एउटा डबल डेकर बस दिल्ली जाँदै थियो । डबलडेकर बस बाराबंकीको हैदरगढमा पूर्वाञ्चल एक्सप्रेसवेमा २४ किलोमिटर पुगेपछि रोकियो । त्यही क्रममा पछाडिबाट तीव्र गतिमा आएको अर्को बसले ठक्कर दिएको थियो ।

दुर्घटनामा दुवै बसका यात्रु घाइते भएका छन् । घाइतेहरूलाई १०८ एम्बुलेन्सबाट सीएचसी हैदरगढ लगिएको छ। जहाँ चिकित्सकले एक महिला र एक किशोरीसहित आठ जनालाई मृत घोषणा गरेका थिए ।

घाइतेमध्ये केहीको अवस्था गम्भीर रहेकाले मृतकको संख्या बढ्ने अनुमान गरिएको छ ।