काठमाडौं । नेपालमा निर्यातको तुलनामा निकै कम घ्यू आयात हुने गरेको पाइएको छ । आर्थिक वर्ष २०७८/०७९ मा नेपालमा कुल १ लाखको घ्यू आयात भएको हो ।

भन्सार विभागको तथ्यांकअनुसार एक वर्षमा एक लाख ८९ हजार रुपैयाँ बराबरको २८२ केजी घ्यू आयात भएको छ । तथ्यांकअनुसार नेपालले भारतबाट घ्यू आयात गरेको छ । सो मूल्य बराबरको घ्यूआयात गर्दा सरकारले एक लाख १० हजार रुपैयाँको राजश्व संकलन गरेको छ ।

१ करोडको घ्यू निर्यात

नेपालबाट भारत, हङकङ, क्यानडा र जापानमा घ्यू निर्यात हुने गरेको पाइएको छ । १ वर्षमा नेपालबाट विदेशमा कुल एक कराेड ९३ लाख ५२ हजार रूपैयाँ बराबरकाे घ्यू निर्यात भएको छ ।

विभागका अनुसार सबैभन्दा बढी घ्यू जापानमा निर्यात भएको छ । उक्त देशमा १२ महिनाको अवधिमा कुल एक करोड ८७ लाख ६९ हजार रुपैयाँको २० हजार ३०५ केजी घ्यू निर्यात भएको छ ।

त्यसपछि भारतमा ३ लाख ९२ हजार रुपैयाँको ८३८ केजी घ्यू निर्यात भएको छ । घ्यू निर्यात हुने अर्को देश क्यानडाबाट १ लाख ९० हजारको ४६० केजी र हङकङमा १ हजारको घ्यू निर्यात भएको छ ।