काठमाडाैं । सद्भावना पार्टी छोडेको घोषणा गरेको भोलिपल्टै सरिता गिरीले सिरहा १ बाट प्रतिनिधिसभाको निर्वाचन लड्ने घोषणा गरेकी छिन् ।

नेता प्रदीप गिरीको इच्छा अनुसार सद्भावना पार्टी छोडेको घोषणा गरेको भोलिपल्टै बिहीबार गिरीले सामाजिक संजालमार्फत् सिरहा १ बाट चुनाव लड्ने घोषणा गरेकी हुन् ।

केही दिन अघि निधन भएका प्रदीप गिरीले २०७४ सालमा सिरहा १ बाट चुनाव जितेका थिए । नातामा गिरीकी बुहारी पर्ने सरिताले मंसिर ४ मा हुने निर्वाचनका लागि सोही क्षेत्र रोजेकी हुन् ।

‘म सिरहाको १ नं निर्वाचन क्षेत्र बाट सांसद पदका लागि निर्वाचन लड्न गई रहेको छु । यो आधिकारिक घोषणा हो । सबै जना संग सहयोगका लागि विनम्रतापूर्वक आग्रह गर्दछु ।’ उनले भनेकी छिन् ।

गिरीले बुधाबार नेपालवाचसँग कुरा गर्दै सद्भावना वा अन्य दलको चुनाव चिन्ह लिएर सिरहा १ बाट चुनाव लड्ने बताएकी थिइन् ।