आज किन भत्काइँदैछ नोएडाको ट्विन टावर ?
काठमाडौं (एजेन्सी) । दिल्लीको छेउमा रहेको नोएडाको सेक्टर ९३ ‘ए’ मा रहेको प्रसिद्ध ट्विन टावरलाई ध्वस्त पारिने भएको छ । आइतबार दिउँसो २ः३० बजे मात्र १२ सेकेन्डमा यी दुवै विवादित टावर भग्नावशेषमा परिणत हुनेछन् ।
समाचार एजेन्सी एएनआईका अनुसार रियल इस्टेट कम्पनी सुपरटेकका यी टावर भत्काउनुअघि धेरै क्रेनहरू त्यहाँ पुगिसकेका छन्। स्थानीय प्रहरी वरिपरिको क्षेत्र क्लियर गराउन जुटेको छ । गैरसरकारी संस्थासँग मिलेर नजिकै रहेका कुकुर धपाउने कामसमेत भइरहेको भारतीय सञ्चारमाध्यमले जनाएका छन् ।
एक गैरसरकारी संस्थासँग आबद्ध एक कार्यकर्ताले मिलेर करिब ३० देखि ३५ कुकुरलाई बचाएको बताए । उनका अनुसार हरेक कुकुरलाई बचाउने प्रयास भइरहेको छ ।
एपेक्स र केएन नामका टावरहरू सुपरटेक बिल्डरले बनाएका हुन्। यी ३० तले भवनलाई ट्विन टावर भनिन्छ। तिनीहरूको उचाइ ३२० फिटभन्दा बढी छ।
भत्काइन लागेका भवन भारतकै सबैभन्दा ठूलो बहुमंजिला भवन हुन् । यी नोएडाको सघन जनसंख्या भएको क्षेत्रमा अवस्थित छन्। तिनीहरूलाई ध्वस्त गराउन लगभग ३२०० केजी विस्फोटक प्रयोग गरिनेछ।
सावधानीलाई ध्यानमा राख्दै यी भवन नजिक रहेका घरहरू खाली गर्न भनिएको छ ।
प्रतिक्रिया