काठमाडौं । काठमाडौं महानगरपालिकाकी उपमेयर सुनिता डंगालले अनधिकृत संरचना बनाउने र बेसमेन्टलाई पार्किङ बनाउने अभ्यासविरुद्ध महानगरपालिकाले गरेको कारवाहीमा आफ्नो समर्थन रहेको प्रष्ट्याएकी छिन् ।

‘सार्वजनिक वा सरकारी जग्गा अतिक्रमण गरी निर्माण गरेका अनधिकृत संरचना (निर्माण कार्य तथा नक्सा स्वीकृती गर्दा भुँइतला वा बेसमेन्टलाई पार्किङ्गको प्रयोजन देखाई पछि अन्य व्यापारिक प्रयोजनमा लगाएका संरचना) हटाउने कार्यलाई केही दिनदेखि काठमाडौँ महानगरपालिकाले निरन्तरता दिदैँ आएको विदितै छ’ उनले भनेकी छिन्, ‘त्यस्ता अनधिकृत संरचना हटाउने अभियान काठमाडौँ महानगरपालिकाको हो । म काठमाडौँ महानगरपालिकाको उपमेयरको हैसियतमा छु । त्यसैले कानुन कार्यान्वयन गर्ने सबै कार्यमा मेरो साथ, सहयोग र समर्थन रहेको स्मरण गराउन चाहन्छु । काठमाडौं महानगरलाई साँच्चिकै स्वच्छ, सुन्दर, जीवन्त र व्यवस्थित सांस्कृतिक नगरका रूपमा थप विकास गर्ने मेरो एजेण्डाप्रति म सजग र सचेत रहेको पनि स्मरण गराउन चाहन्छु ।’

तर आफ्नाबारे भ्रम सिर्जना हुने गरी प्रचार भएको भन्दै उनले ध्यानाकर्षण भएको बताएक छिन् ।

‘केही दिनदेखि मुख्य गरेर केही अनलाईन मिडियाहरुमा महानगरपालिकाको पछिल्लो अभियानसँग मलाई जोडी आम महानगरवासीमा समेत भ्रम सिर्जना गर्ने गरी गरेका समाचार सम्प्रेषणप्रति मेरो ध्यानाकर्षण भएको छ । पत्रकारिता क्षेत्रलाई राष्ट्रको चौथो अंगका रुपमा लिइने गरिएको छ । पत्रकारिता क्षेत्रमै निरन्तर लागिरहनु भएका पत्रकार मित्रहरुलाई पत्रकारिताका तीन सिद्धान्त सत्यता, सन्तुलन र विश्वसनीयताका बारेमा मैले यहाँ व्याख्या गरिरहनु पर्ने आवश्यकता ठानेको छैन’ उनले भनेकी छिन्, ‘ यद्यपि, पत्रकारिताको धर्म र मर्मलाई समेत सामान्य हेक्का नराखी वा मसँग जोडिएका समाचारमा मेरो कुनै प्रतिक्रिया नै समावेश नगरी एकपक्षीय र अनुमानका भरमा समाचार सम्प्रेषण गरी भ्रम सिर्जना गर्ने कार्यले पत्रकारिताप्रतिको विश्वसनीयता नै कमजोर हुनेप्रति ख्याल राखिदिनुहुन अनुरोध गर्दछु ।’

काठमाडौं महानगरपालिकाले केही दिनयता अनधिकृत संरचना हटाउने, पार्किङ भनेर नक्सा पासमा छुट लिएर बनाइएका बेसमेन्टलाई भाडामा लगाउने काम अन्त्य गर्न महागरका मेयर बालेनले सक्रियतापूर्वक अभियान नै चलाएका छन् । यो अभियानमा उपमेयरको साथ नभएको भनेर प्रचार गरिएपछि डंगोलले नै अपिल जारी गर्दै कानुन कार्यान्वयन गराएर यस्ता अनियमित कामविरुद्धमा आफ्नो पूर्ण साथ र सहयोग हुने बताएकी हुन् ।