काठमाडौं । माओवादी केन्द्रका अध्यक्ष पुष्पकलम दाहाल प्रचण्डले गठबन्धन दलहरूबीच सिट बाँडफाँट अन्तिम चरणमा पुगेको दाबी गरेका छन् ।

सुदूरपश्चिमको धनगढी विमानस्थलमा मंगलबार पत्रकारहरूसँग कुराकानी गर्दै उनले आज बेलुकासम्म भागबण्डा टुंगो लाग्ने बताए ।दलहरूबीच सिट संख्या, क्षेत्र र प्रदेश एकैपल्ट टुंग्याउने गरी गृहकार्य भएका कारण सहमतिमा केही ढिलाइ भएको उनको भनाइ छ ।

‘सिट संख्यामा सबैले आ–आफ्नै दाबी गरेका थिए । दाबी गर्नु र मिलाउनु फरक विषय हो । कांग्रेस १०० बाट झरेर ८० को वरिपरी आएका छन्’, प्रचण्डले भने, ‘हामीले ६० सिट दाबी गरेका थियौं । त्यसमा लचिलो भएर केही सिट तलमाथि हुन सक्छ । कार्यदलले आफ्नो प्रतिवेदन बुझाएपछि भोलि शीर्ष नेताहरू बसेर टुंग्याउँछौं ।’

उनले जसपा र एकीकृत समाजवादीले २५ को हाराहारीमा सहमति नजिक रहेको जिकिर गरे । यसअघि कांग्रेसले १००, माओवादीले ६०, एकीकृत समाजवादीले ४०, जसपाले ३२ र राष्ट्रिय जनमोर्चाले २ सिटमा दाबी गरेका थिए ।

त्यस्तै माओवादीको नेतृत्वमा भएको सडक संघर्षका कारण देश निर्वाचनमा होमिएको दाबी गर्दै उनले निर्वाचनपछि राजनीतिक संकट टर्ने बताए । प्रतिनिधिसभा तथा प्रदेशसभाको आयु एक दिन पनि लम्ब्याउन नहुने उनले बताए ।