काठमाडौं । दशैंको लागि अग्रिम टिकट बुकिङ यही असोज १ गते शनिबारबाट खुल्ने भएको छ । सार्वजनिक सेवा प्रदायकहरूले मध्यम तथा लामो दूरीका सार्वजनिक यातायातहरूको बुकिङ सो दिनबाट खुलाउन लागेको यातायात व्यवस्था विभागले जनाएको छ ।

विभागका अनुसार अनलाइनमार्फत टिकट बुकिङ गर्ने यात्रुका लागि व्यवसायीहरूले छुट तथा सहुलियतकोसमेत व्यवस्था गर्नेछन् ।

यातायात आवगमन सहज बनाउनका लागि खाद्यन्नलगायतका अत्यावश्यक वस्तुहरूको ढुवानी गर्नेबाहेकका ट्रेलर लगायतका ठूला सवारी साधनहरूलाई रोक लगाइने छ । विभागका महानिर्देशक टोकराज पाण्डेले जानकारी दिएअनुसार असोज १५ देखि २२ गतेसम्म नारायणघाटदेखि काठमाडौंसम्म उक्त सवारी साधनहरूलाई रोक लगाउने निर्णय भएको हो ।

त्यस्तै, यात्रुवाहक सवारी साधनलाई घटस्थापनादेखि पूर्णिमासम्म नेपालभर लागू हुनेगरी रूट परमिट खुला गरिनेछ । तर, बाटोको अवस्था तथा प्रकृतिका कारण त्यहाँ निषेध गरिएका सार्वजनिक सवारीहरूलाई लगाइएको बन्देज भने कायमै रहने उनले बताए ।

योसँगै अग्रिम टिकट बुकिङ तथा उपत्यकाबाट बाहिरिने र भित्रिने यात्रुवाहक सवारी साधनको विभाग, ट्राफिक प्रहरी, उपभोक्ता मञ्च, व्यवसायी र मजदूरहरूसँग सहकार्य गरी अनुगमन हुने निर्णय भएको छ ।

उनका अनुसार विभागले सवारी गुड्ने मुख्य सडकलाई मर्मत संभार गरी यातायात सञ्चालनलाई सहज बनाउन सम्बन्धित निकायलाई पत्राचार गर्ने निर्णय पनि भएको छ ।

कोभिड–१९ को प्रकोप अझै कायम रहेको हुँदा स्वास्थ्य मापदण्डको पालना भने अनिवार्य गरिएको छ ।