काठमाडौं । बलात्कारको संगीन आरोप खेपेका नेपाली क्रिकेटर सन्दीप लामिछाने नेपाल क्रिकेट संघ (क्यान) को सम्पर्कमा आएका छन् ।

क्यारेबियन प्रिमियर लिगमा सहभागिताका लागि वेस्ट इण्डिजमा रहेका सन्दीप आफूहरूसँग सम्पर्कमा आएको क्यानका एक पदाधिकारीले बताए ।

क्यानका ती पदाधिकारीका अनुसार, सन्दीपले नाबालिकाद्वारा लगाइएको बलात्कारको आरोप अस्वीकार गरेका छन् । उनले आफू निर्दोष रहेको र क्यारेबियन प्रिमियर लिग सकिएलगत्तै स्वदेश फर्किने प्रतिबद्धता पनि जाहेर गरेका छन् ।

‘हाम्रो सम्पर्कमा जोडिनु भएको सन्दीपले अभियोग अस्वीकार गर्नुभएको छ,’ क्यानका ती पदाधिकारीले भने, ‘क्यारेबियन प्रिमियर लिग जारी रहेकाले त्यो सकिएलगत्तै नेपाल फर्कंने जानकारी उहाँले गराउनुभएको छ ।’

सन्दीपले क्यानका पदाधिकारीसँग सहयोगको अपेक्षासमेत राखेका छन् ।

नेपाली राष्ट्रिय क्रिकेट टिमका कप्तानमाथि बलात्कार गरेको जाहेरी प्रहरीमा परेपछि बुधबार क्यानको बैठक बसेको थियो । तर उसले तत्काल उनीमाथि कुनै कारबाही नगर्ने भएको छ । अभियोग मात्र लागेकाले छानबिनको निष्कर्षसम्म पर्खिने क्यानको भनाइ छ ।

सन्दीपविरुद्ध एक नाबालिकाले मंगलबार बलात्कार गरेको जाहेरी प्रहरीमा दिएकी थिइन् । जाहेरीपछि प्रहरीले घटनाबारे अनुसन्धान अघि बढाएको छ ।