काठमाडौं । १३ वर्षीय सजन महर्जन पाँच दिनदेखि बेपत्ता छन् । पाँच दिन बितिसक्दा पनि फेला पर्न नसकेको उनका आफन्तले बताएका छन् ।

काठमाडौं महानगरपालिका वडा नं. २, कैलाशचौरमार्ग, लाजिम्पाटबाट २०७९ भदौ २६ गते आइतवार बिहान करिब ७ बजेको समयमा उनी कसैलाई केही थाहा नदिइ कोठाबाट निस्किएका थिए । त्यसपछि सजनको कुनै अत्तोपत्तो छैन ।

उनकी आमा कोपीला महर्जनले आफ्नो एकमात्र छोरा हराएको हुँदा खोजतलास गरी पाउँ भनी प्रहरी बृत्त दरवारमार्ग र सोह्रखुट्टेमा भदौ २७ गते निवेदन दिएको बताइन् ।

पानीपोखरीस्थित भानुभक्त मेमोरियल स्कुलमा कक्षा ७ मा अध्ययनरत सजन आइतवारदेखि विद्यालयमा अनुपस्थित रहेका छन् । सजनलाई कोही कसैले देखेमा वा भेट्टाएएमा नजिकको प्रहरी, आमसञ्चार वा परिवारलाई खबर गरिदिन आमा कोपीला (९८२३६०८९२४) ले अपील गरेकी छिन्  ।