काठमाडाैं । चाडपर्व नजिकिएसँगै बाणिज्य बैंकहरूमा निक्षेप बढ्न थालेको छ । चाडपर्वको समयमा विदेशबाट रेमिट्यान्स भित्रिदा बैंकहरूमा निक्षेप बढ्न थालेको हो ।

नेपाल बैंकर्स संघका अनुसार पछिल्ला दुई सातामा वाणिज्य बैंकहरुमा झण्डै ८७ अर्ब रुपैयाँ निक्षेप थपिएको छ । असोजको पहिलो सातामा मात्रै वाणिज्य बैंकहरुको निक्षेप २६ अर्ब रुपैयाँले बढेको छ ।

गत साता वाणिज्य बैंकहरुमा २६ अर्ब १४ करोड निक्षेप थपिएको छ । त्यो भन्दा अधिल्लो साता ४५ अर्ब ५४ करोड निक्षेप थपिएको थियो । भदौको अन्तिम साता र असोजको पहिलो सातामा गरेर वाणिज्य बैंकहरुमा ८६ अर्ब ६८ करोड रुपैयाँ निक्षेप थपिएको छ । यसअवधिमा बैंकहरुले ६ अर्ब २० करोड मात्र कर्जा विस्तार गरेका छन् ।