काठमाडौं । काठमाडौं महानगरपालिका वडा न १० बिजुली बजार क्षेत्रमा ट्राफिक प्रहरी जवान रवीन्द्रकुमार यादवले काठमाडाैं उपत्यका ट्राफिक प्रहरी कार्यालयकी प्रहरी नायब महानिरीक्षक (डिआइजी) मीरा चौधरीको नाममा रकम असुली गर्न थालेका छन् । उनले नयाँ बानेश्वोर , धोबीखोला किनारमा रहेका होटेलबाट रकम असुली गर्न थालेका हुन् ।

गाडी लक् र फलामको साङ्लो लिएर हिडने ट्राफिक प्रहरी जवान यादवले गाडी र मोटर साइकलमा लक् लगाएपछि सम्झाई बुझाइ गरेको जस्तो गर्दै गाडी र मोटर साइकल नम्बर डायरीमा टिप्ने र २०० देखि रु ५०० रुपैयाँ घुस लिएर लक् खोलि दिने गर्दछन् । योसँगै ट्राफिक प्रहरी जवान यादवले आफूले खोला किनारमा पार्किङ्ग गर्न दिएकोले दशैंको बेला सहयोग गर्नु पर्ने अन्यथा एक मिनेट पनि पार्किंङ गर्न नदिने भन्दै त्यस क्षेत्रका पसल र होटलहरूसँग रकम माग गर्ने गर्दछन् ।

उनले यसरी उठाएको रकममाथिसम्म पुर्याउनु पर्ने भन्दै आफू काठमाडाैं उपत्यका ट्राफिक प्रहरी कार्यालयकी डिआइजी चौधरीको नजिकको मानिस भएकोले उजुरबाजुर गरे राम्रो नहुने भन्दै धम्क्याउँदै आएका छन्।