काठमाडौं । लुम्बिनी प्रदेशका प्रदेश प्रमुख अमिक शेरचनले कर्णाली प्रदेश प्रमुखकोसमेत जिम्मेवारी पाएका छन् ।

प्रधानमन्त्रीको सिफारिसमा शुक्रबार राष्ट्रपति विद्यादेवी भण्डारीले कर्णाली प्रदेशका प्रदेश प्रमुखमा शेरचनलाई जिम्मेवारी तेकेकी हुन् ।

२०७९ असोज १९ र २० गते क्यानडाको ओटावामा आयोजना हुने कार्यक्रममा भाग लिन कर्णाली प्रदेशका प्रदेश प्रमुख तिलक परियार जान लागेकाले उनको अनुपस्थितिमा कार्यभार दिएको राष्ट्रपतिको कार्यालयले जानकारी दिएको छ ।

प्रदेशमा प्रदेश प्रमुख मात्र रहने संविधानमा व्यवस्था रहेको छ । जिम्मेवारी तोकिएसँगै दुईवटा प्रदेशको प्रदेश प्रमुखको जिम्मेवारी पाउने शेरचन पहिलो हुन् ।

प्रदेश प्रमुखको अनुपस्थितिमा मन्त्रिपरिषद्को सिफारिसमा राष्ट्रपतिले अन्य प्रदेश प्रमुखलाई जिम्मेवारी तोक्न सक्ने संवैधानिक व्यवस्था रहेको छ ।