काठमाडौं (एजेन्सी) । इन्डोनेसियाले कन्जरुहान रंगशाला भत्काउने घोषणा गरेको छ ।

राष्ट्रपति जोको विडोडोले कन्जरुहान रंगशाला फिफाको नियमअनुसार पुनर्निर्माण गरिने बताए ।

राष्ट्रपति विडोडोले हालै फिफा अध्यक्ष जियानी इन्फान्टिनोसँगको भेटेका थिए । उनीसँगको भेट लगत्तै विडोडोले रंगशाला भत्काउने घोषणा गरेका हुन् ।

यसै महिना आयोजित एक फुटबल खेलमा भागदौड हुँदा यो रंगशालामा कम्तीमा १३१ जनाको मृत्यु हुनुका साथै सयौं घाइते भएका थिए ।

उनले फुटबलको व्यवस्थापन गर्ने तरिका देशले पूर्ण रूपमा परिवर्तन गर्नुपर्ने पनि बताए ।

इन्डोनेसियाले २०२३ मा हुने यू–२० विश्वकप आयोजना गर्ने तयारी गरेको छ । यही कारण पनि इण्डोनेसियामाथि आफ्नो रंगशाला सुरक्षित रहेको देखाउनुपर्ने दबाब छ ।

फिफा प्रमुखले फुटबल खेल हेर्ने दर्शकलाई सुरक्षाको प्रत्याभूति दिलाइने बताए ।