काठमाडौं । बलात्कार आरोपमा हिरासतमा रहेका क्रिकेटर सन्दीप लामिछानेमाथि काठमाडौं जिल्ला अदालतले अनुसन्धानका लागि दुई दिनको समय थप गरेको छ । प्रहरीलाई अनुसन्धानका लागि अदालतले दुई दिनको थप समय दिएको हो ।

यस अघि उनीमाथिको अनुसन्धानको लागि चार दिनको समय दिइएको थियो । यस अघि दुई पटक सात सात दिन, अर्कोपटक चार दिनको म्याद थप गरी प्रहरीले सन्दीपमाथिको अनुसन्धान अघि बढाएको थियो ।

एक नाबालिक किशोरीले सन्दीपबाट आफू बलात्कृत भएको भन्दै २१ भदौमा गौशाला प्रहरीमा जाहेरी दिएकी थिइन् । ५ भदौमा सन्दीपले नगरकोट घुमाएको र राति काठमाडौंको गौशालास्थित एक होटमा आफूमाथि सन्दीपले जबर्जस्ती बलात्कार गरेको आरोप ती किशोरीले लगाएकी थिइन् ।

तर सन्दीप ६ भदौमा क्रिकेट खेल्न केन्या पुगेका थिए । उतैबाट क्यारेबियन लिग खेल्न वेस्ट इण्डिजका देश पुगेका थिए । यही बेला सन्दीपमाथि बलात्कारको आरोप लागेको थियो । तर आरोप लागेको एक महिनामा २० असोजमा सन्दीप नेपाल फर्किएका थिए । उनी अहिले पनि प्रहरीको हिरासतमा छन् ।

अब प्रहरीले संकलन गरेको प्रमाणसहितका आधारमा सरकारी वकिल कार्यालयले सन्दीपविरुद्ध अदालतमा मुद्दा दायर गर्नेछ । उनीमाथि मुद्दा दायर भएपछि मुद्दा हिरासतमै बसेर लड्ने कि बाहिर बसेर भन्ने टुंगो लाग्नेछ ।