काठमाडौं । दक्षिण अफ्रिका पराजित भएपछि जितेर सेमिफाइनल पुग्ने सकिने खेलमा बंगलादेशले पाकिस्तानलाई कमजोर चुनौती दिएको छ ।

टस जितेर ब्याटिङ गरेको बंगलादेशले पाकिस्तानलाई १२८ रनको मात्रै लक्ष्य दिएको हो । सुरुवात राम्रै गरे पनि बंगलादेशले २० ओभरमा अपेक्षित रन बनाउन नसकेको हो ।

साहिन अफ्रिदीले चार विकेट चड्काएपछि ८ विकेट गुमाएर बंगलादेशले १२७ रन बनाएको हो । अब पाकिस्तानले १२८ रन २० ओभरमा बनाउन सके भारतसँगै सेमिफाइनलको यात्रा तय गर्नेछ ।

बंगलादेशका लागि नजमुल हुसेनले ५४ रन बनाए । अफिफ हुसेनले २० बलमा नटआउट २४ रन र सौम्य सरकारले २० रन बनाउनुबाहेक अरु कुनै ब्याटरले दोहोरो अंकमा रन बनाउन सकेनन् । पाकिस्तानका लागि साधव खानले पनि २ विकेट लिए ।

समूह एबाट न्युजिल्याण्ड र इंग्ल्याण्ड सेमिफाइनलमा पुगेका छन् । नेदरल्याण्डससँग पराजित भएपछि सहज अवस्थामा हुँदाहुँदै दक्षिण अफ्रिका बाहिरिएको हो । अब पाकिस्तान र बंगलादेशबीचको विजेता सेमिफाइनलमा पुग्नेछन् ।

सेमिफाइनल पुग्ने सहज अवस्था हुँदाहुँदै पनि दक्षिण अफ्रिका टी २० विश्वकपबाट बाहिरिएको छ । चार खेलबाट ५ अंक पहिले नै भएको दक्षिण अफ्रिकालाई अन्तिम अर्थात पाँचौ खेलमा प्रतिद्वन्द्वी पनि कमजोर थियो । अर्थात विश्व क्रिकेटमा खारिएको दक्षिण अफ्रिकाविरुद्ध नेदरल्याण्डस उम्दा टोली थिएन । तर यही नेदरल्याण्डससँग सुपर १२ को अन्तिम खेलमा दक्षिण अफ्रिका १३ रनले स्तब्ध हुन पुगेको हो । पहिले ब्याटिङ गर्दै नेदरल्याण्डसले १५८ रन बनाएको थियो । तर १५९ रनको लक्ष्य पछ्याएको दक्षिण अफ्रिका २० ओभरमा ८ विकेट गुमाएर १४५ रनमात्रै बनाउन सकेको हो ।

नेदरल्याण्डविरुद्ध दक्षिण अफ्रिकाका बलर पनि हाबी हुन सकेनन् । उसले जम्मा चार विकेट गुमाएर १५८ रन बनाएको थियो । दक्षिण अफ्रिकाका अनुभवी बलर नै महंगा सावित हुँदा अनुभवी टोलीविरुद्ध नेदरल्याण्डसले सहज जित हात पारेको हो ।

१५९ रनको लक्ष्य पछ्याएको दक्षिण अफ्रिकाका लागि रिले रुसोको २५ रन नै उच्च रहन पुग्यो । दक्षिण अफ्रिकालाई स्तब्ध पार्न नेदरल्याण्डसका बलरले कसिलो बलिङ गरे ।