काठमाडौं । प्यूठानमा जिप दुर्घटना हुँदा ३ जनाको ज्यान गएको छ भने एक दर्जन घाइते भएका छन् ।

जिल्लाको बिजुवारबाट पूर्णगाउँतर्फ गइरहेको लु १ ज ३७०७ नम्बरको फोर्स जिप गएराति करिब १ बजेतिर प्युठान नगरपालिका–५, पूर्णगाउँनजिक कुडापानीमा दुर्घटना भएको हो ।

घटनामा प्युठान नगरपालिका–५, पातलकटेरीका खुमान थापा, उनकी श्रीमती जुनकी थापा र सोही स्थानकी महिमा घर्तीको मृत्यु भएको जिल्ला प्रहरी कार्यालय, प्यूठानले जनाएको छ ।

घटनामा १२ जना घाइते भएका छन् । यसमध्ये ६ को अवस्था गम्भीर छ । उनीहरूलाई उद्धार गरेर बिजुवार अस्पताल पुर्याइएको छ ।

सडकबाट अनियन्त्रित भई जिप अन्दाजी १५० मिटर तल खसेको छ । दुर्घटनाको कारण नखुलेको र अनुसन्धान भइरहेको प्रहरीले जनाएको छ ।