काठमाडौं । निजी वायुसेवा कम्पनी बुद्ध एयरले पोखरा क्षेत्रिय अन्तर्राष्ट्रिय विमानस्थलबाट बनारस उडान गर्ने भएको छ । बुद्धले २०२३ को जनावरीदेखि हप्ताको तीन दिन(आइतबार, मंगलबार र बिहिबार) पोखरा–बनारस–पोखरा उडान गर्ने भएको हो ।

हाल बुद्धले काठमाडौंबाट बनारस उडान गर्दै आएको छ । नागरिक उड्डयन प्राधिकरणले जनावरी महिनादेखि पोखराबाट पनि उडानका लागि तयार रहन यसअघि नै पत्राचार गरेको कम्पनीले जनाएको छ ।

योसँगै बुद्धले पोखराबाट दिल्ली र देहरादुन उडानका लागि पनि प्रक्रिया अघि बढाइसकेको जानकारी दिएको छ । हाल भारत सरकारसँग नेपाल सरकारको हवाइ रूटका लागि पहल भइरहेको छ ।

भारतले हवाइ रूट र स्लटका लागि स्वीकृति दिनेवित्तिकै प्रत्येक दिन दिल्लीमा दुई उडान र देहरादुनमा सातामा तीन उडान गर्ने कम्पनीले जनाएको छ।