काठमाडौं । कम्बोडियाका प्रधानमन्त्री हुन सेनलाई कोरोनाभाइरस संक्रमण भएको छ । विश्वका औद्योगिक राष्ट्रहरूको संगठन जी २० शिखर सम्मेलनमा सहभागी हुन इण्डोनेसियाको बालीमा रहेका उनलाई मंगलबार कोरोनाभाइरस संक्रमण पुष्टि भएको हो ।

उनले सामाजिक सञ्जालमार्फत आफू कोभिड–१९ बाट संक्रमित हुन पुगेको जनाएका छन् ।

आइतवार सम्पन्न भएको दक्षिणपूर्वी एसियाली राष्ट्रहरू (आसियान) शिखर सम्मेलनको आयोजक कम्बोडिया थियो। त्यसक्रममा उनले अमेरिकी राष्ट्रपति जो बाइडनलगायत विश्वका धेरै देशका शीर्ष नेतासँग भेटवार्ता गरेका थिए ।

कोरोना संक्रमित भएपछि सेनले सम्मेलन छाडेर कम्बोडिया फर्कंने बताएका छन् । उनी बैंककमा हुने एसिया प्यासिफिक इकोनोमिक को–अपरेसन बैठकमा पनि सहभागी हुने छैनन् ।