काठमाडौं । भारतको एक कम्पनीले नेपालमा विषाक्त स्यानिटाइजर बिक्री वितरण गरेको पाइएको छ । कुञ्जपुरा कर्नलमा रहेको भारतीय कम्पनी ग्लोबल हेल्थकेयरले विषाक्त मेथानल मिसिएको स्यानिटाइजर नेपालमा बिक्री गरेको हो । गुणस्तरहीन स्यानिटाइजर बजारमा बिक्री वितरण गरेको पुष्टि भएसँगै विभागले त्यसको बिक्री वितरण रोकेर फिर्ता गर्न निर्देशन दिएको छ ।

ग्लोबलको ब्याच नं. केयर–११–२२ को सिजिएच ह्याण्ड स्यानिटाइजर ५०० एमएल गुणस्तरहीन रहेको गुनासोपछि औषधि व्यवस्था विभागले नमुना संकलन गरेर राष्ट्रिय औषधि प्रयोगशाला, काठमाडौंमा परीक्षण गरेको थियो । नतिजामा उक्त स्यानिटाइजरमा विषाक्त पदार्थ मिथानल भेटिएको विभागले जनाएको छ ।

जनवरी २०२२ मा उत्पादन गरेर डिसेम्बर २०२४ सम्म म्याद राखिएको स्यानिटाइजर गुणस्तरहीन पुष्टि भएपछि विभागले फिर्ता गर्न निर्देशन दिएको छ । औषधि ऐन २०३५ को दफा १४ अनुसार ग्लोबल हेल्थकेयरको ह्याण्ड स्यानिटाइजर बजारबाट फिर्ता (रि–कल) गर्न निर्देशन दिएको विभागले जनाएको छ । साथै विभागले यो स्यानिटाइजर प्रयोग नगर्न र फिर्ता गरिएको विवरण विभागमा पेस गर्न सम्बन्धित उद्योग, आयातकर्ता र तिनका प्रतिनिधिलाई आग्रह गरेको छ ।