काठमाडौं । माओवादी केन्द्रका अध्यक्ष पुष्पकमल दाहाल प्रचण्ड सहभागी हुने भोजपुरको एक चुनावी सभामा विस्फोट भएको छ ।

सत्ता गठबन्धनले गर्न लागेको भोजपुरस्थित पौवादुम्मा गाउँपालिकाको तिवारी भञ्याङको चुनावी सभामा विस्फोट भएको हो । अन्य स्थानका कार्यक्रममा सहभागी भई प्रचण्ड सो कार्यक्रममा सहभागी हुने कार्यक्रम थियो । विस्फोटमा परी सुमन श्रेष्ठ घाइते भएका छन् । उनी अरुण गाउँपालिका चरम्बिका हुन् ।

श्रेष्ठले टिफिन बक्समा बोकेको विस्फोटक पदार्थ विस्फोट भएको प्रहरीले जनाएको छ ।

चुनाव बहिष्कार गर्ने नीति लिएको विप्लव नेतृत्वको नेकपाका कार्यकर्ताले झोलामा बोकेको बम विस्फोट गराएकाे बताइएकाे छ ।

आफैंले बोकेको बम पड्किएर श्रेठको देब्रे खुट्टा चोटसमेत लागेको छ । उनलाई प्रहरीले नियन्त्रणमा लिएको जनाएको छ ।

प्रचण्डको मंगलबार मात्रै सुनसरी, मोरङ, भोजपुर, खोटाङ र ताप्लेजुङसहितका स्थानमा चुनावी सभाको कार्यक्रम थियो । तर बम विष्फोट प्रचण्ड नपुग्दै भएको हो ।