काठमाडौं । सेनेगलका कप्तान साडियो माने आइतबारदेखि कतारमा सुरु हुने फिफा विश्वकपमा नदेखिने पक्का भएको छ ।

बायर्न म्युनिखमा आबद्ध माने दुई साताअघि घाइते भएका थिए । तथापि सेनेगलले उनलाई टिममा समेटेको थियो । बिहीबार उनको खुट्टाको शल्यक्रिया भएसँगै उनी आगामी आइतबार कतारमा हुने विश्वकपमा नदेखिने पक्का भएको हो ।

सेनेगल फुटबल फेडेरेसनले माने विश्वकपबाट बाहिरिएको पुष्टि गरेको छ । साथै उसले कतारमा विश्वकपमा सेनेगलको टिमले मानेका लागि खेल्ने बताएको छ ।

नोभेम्बर ८ मा वेडर ब्रेमेनविरुद्धको खेलमा मानेको खुट्टामा चोट लागेको थियो । शल्यक्रिया गरिएकाले माने अबको करिब तीन महिना मैदानमा देखिने छैनन् ।