काठमाडौं । यूएईले निर्णायक खेलमा नेपाललाई १७७ रनको लक्ष्य दिएको छ । टस जितेर पहिले बलिङ गर्ने नेपालको निर्णयपछि बलरले उत्कृष्ट प्रदर्शन गर्दा नेपालले कम लक्ष्य पाउने देखिएको थियो ।

तर अन्तिम विकेटका लागि आयान खान र हजरत विलालले ८३ रनको साझेदारी गरेपछि युएईले नेपाललाई १७७ रनको लक्ष्य दिएको हो । ३१.१ ओभरमा ९ विकेट गुमाइसकेको यूएईले पूरै ५० ओभर नै खेलेर ९ विकेट क्षतिमा १७६ रन बनाएको हो ।

११ रन बनाउँदा पहिलो विकेट लिएको नेपालले जम्मा ९३ रन यूएईले जोड्दासम्म ९ विकेट लिइसकेको थियो ।

१६ रन हुँदा तीन विकेट गुमाइसकेको युएईको ७९ रन हुँदा बल्ल चौथो विकेट गुमेको थियो । तर चौथो विकेट गुमेपछि १३ रन थप जोड्दा यूएईले अर्को पाँच विकेट पनि गुमायो । तर आयान खान र हजरत विलालले महत्वपूर्ण इनिङ खेलेका हुन् ।
आयानले ५४ र बिलालले २० रन जोडे ।

नेपालको लागि गुल्सन झा, दीपेन्द्रसिंह ऐरी र कुशल भुर्तेलले समान २\२ विकेट लिएका हुन् ।

ललित राजवंशी र सोमपाल कामीले पनि एकएक विकेट लिएका छन् ।

यूएईको लागि अलिसान सराफुले ३३, रोहन मुस्तफाले २४ र महम्मद वसिमले ११ रन बनाए ।

यस अघिको दुई खेलमा पहिलोमा यूएई र दोस्रो नेपाल विजयी भएका थिए । पहिलोमा यूएई ८४ रनको फराकिलो अन्तरले विजयी भएको थियो । दोस्रोमा नेपाल ३ विकेटले विजयी भएको थियो ।