काठमाडौं । प्रतिनिधि तथा प्रदेशसभा निर्वाचनको मतगणना जारी छ । चुनावअघि विभिन्न समारोह तथा अन्तर्वार्तामा राष्ट्रिय स्वन्तन्त्र पार्टी तथा कुनै पनि स्वतन्त्रका उम्मेदवारले एक सिट पनि नजित्ने दाबी गरेका एमाले अध्यक्ष केपी शर्मा ओलीको भनाईलाई हालको नतिजाले परास्त पारेको छ ।

रास्वपाका सभापति रवि लामिछाने ओलीको भन्दा भारी मतान्तरसहित विजयी भएका छन् ।

रास्वपाले ल्याउन सक्ने सम्भावित नतिजाबारे विश्वास गर्नै नचाहने प्रमुख पात्र थिए एमाले अध्यक्ष ओली । बुधबारसम्मको निर्वाचन मतपरिणामअनुसार आफ्ना निकटतम प्रतिस्पर्धीको तुलनाम सबैभन्दा भारी मतान्तरले विजयी हुने ओली नै थिए ।

तर, आज विहानको नयाँ नतिजाले उनको यो रेकर्डलाई रास्वपाका सभापति रवि लामिछानेले तोडिदिएका छन् ।

ओलीले झपा ५ बाट आफ्ना निकटतम प्रतिस्पर्धी खगेन्द्र पाण्डव अधिकारीलाई २८ हजार ५७३ मतले पछाडि पारेका थिए । उनले कुल ५२ हजार ३१९ मत प्राप्त गरेर प्रतिनिधिसभा सांसद चुनिए । यता लामिछानेले ३४ हजार १६२को अझ फराकिलो मतान्तरले जितेका छन् ।

उनले आफ्ना प्रतिद्वन्द्वी कांग्रेस उम्मेदवार उमेश श्रेष्ठलाई उक्त मतान्तरले पछि पारेका हुन् । रविले कुल ४९ हजार २३१ मत प्राप्त गरेका छन्।

केही महिनाअघिमात्रै दर्ता भएको राष्ट्रिय स्वतन्त्र पार्टीले ल्याएको उल्लेख्य नतिजाले आगामी सरकार समिकरण कस्तो बन्ला भन्ने धेरैको कौतुहुला छ ।