काठमाडौं । भोजपुरमा प्रदेश नं १ का पूर्वमुख्यमन्त्री शेरधन राईलाई पराजित गर्दै सत्ता गठबन्धनबाट नेकपा (माओवादी केन्द्र) का सुदन किराँती प्रतिनिधिसभा सदस्यमा विजयी भएका छन् ।

उनले राईलाई दुई हजार तीन सय ८५ मतान्तरले पराजित गर्दै जित निकालेका हुन् ।

किराँती तेस्रो पटक सांसदमा विजयी भएका हुन् । उनले २८ हजार पाँच सय ७८ मत प्राप्त गरे भने एमालेका राई २६ हजार एक सय ९३ मतमा रोकिए ।

शेरधन एमाले अध्यक्ष ओलीका विश्वासपात्र हुन् । ०७४ मा प्रदेश झरेर मुख्यमन्त्री बनेका उनको हारसँगै संसदीय यात्रामा ब्रेक लागेको छ ।

यस क्षेत्रमा कूल एक लाख २३ हजार तीन सय ७९ मतदाता रहेकामा ६१ हजार आठ सय ३० जनाले मतदान गरेका थिए । तीन हजार एक सय ६८ मत बदर भएको थियो । भोजपुरमा प्रतिनिधिसभातर्फ १२, प्रदेशसभा (१) मा सात तथा प्रदेशसभा (२) मा छ उम्मेदवारले निर्वाचनमा भाग लिएका थिए ।