काठमाडाैं । दार्चुलाको शैल्यशिखर नगरपालिका  रहेको मालिकार्जुन माध्यमिक विद्यालय मिलमीलीमा विद्यार्थीहरुले तालाबन्दी गरेका छन् ।

लामो समयदेखी विद्यालयमा दरबन्दी अनुसारका शिक्षक नहुँदा पठनपाठनमा समस्या भएको भन्दै विद्यार्थीरूले तालाबन्दी गरेका हुन् ।
विषयगत शिक्षकहरू नभएकोले पटक पटक शिक्षक पदपुर्तीको लागी माग गर्दा समेत शिक्षक पदपुर्ती नभएपछि विद्यालयमा अनिश्चितकालिन तालाबन्दी गरिएको हो ।

शैक्षिक शत्रको आधा भन्दा बढी समय बितिसक्दा समेत विद्यालयमा शिक्षक नहुँदा पढाइ प्रभावित भएकोले बाध्य भएर तालाबन्दी गर्नुपरेको विद्यार्थीहरुको भनाइ छ ।

नगरपालिकाले करारमा राखेका नगर शिक्षक गत बैशाखमा भएको स्थानीय तहको निर्वाचनमा नगरपालिकामा नयाँ नेतृत्व आए संगै नगर करार शिक्षकको करार अवधि थप नगर्ने निर्णय गरेको थियो ।

सोही निर्णय अनुसार विद्यालयमा रहेका नगर करार शिक्षक हटाइएका थिए ।

नगरपालिकाले विद्यालयमा नयाँ शिक्षक भर्ना नगरेकोले विद्यालयमा शिक्षक अभाव भएको र विद्यार्थीको पढाइ समेत प्रभावित भएको विद्यालयका प्रधानाध्यापक विर सिंह खातीले बताए ।

विद्यालयका प्रधानाध्यापक खातीका अनुसार विद्यालयले आवश्यक शिक्षक पदपुर्तीको लागी नगरपालिकामा मौखिक रुपमा जानकारी गराएको र अहिले सम्म कुनै प्रतिक्रिया नदिदा यस्तो समस्या आएको हाे ।