काठमाडौं । पार्टी नेतृत्वसँगको असहमतिका कारण नेकपा एमाले परित्याग गरेका घनश्याम भुसाल माधवकुमार नेपाल नेतृत्वको नेकपा (एकीकृत समाजवादी) मा प्रवेश गर्ने भएका छन् ।

पार्टी प्रवेशका लागि शुक्रबार दिउँसो २ बजे बानेश्वरस्थित अर्याल होटलमा कार्यक्रम आयोजना गरिएको छ । भुसालले त्यही कार्यक्रमबाट एकीकृत समाजवादी प्रवेशको घोषणा गर्नेछन् ।

उनलाई दिने जिम्मेवारीबारे भने टुंगो लागिनसकेको बताइएको छ । सम्भवतः उनले उपाध्यक्ष वा महासचिवमध्ये कुनै एक जिम्मेवारी पाउनेछन् ।

बौद्धिक र सैद्धान्तिक नेताको छवि बनाएका भुसाल एमाले एकीकृत छँदा माधवकुमार नेपाल समूहमा थिए । तर पार्टी विभाजनका बेला उनी माधवतिर नलागेर एमालेमै बसेका थिए । तर माधवबिनाको एमालेमा उनको बसाइँ सुखद रहेन । उनी लगातार ओलीको खेदाइमा परिरहे । अध्यक्ष ओलीसँगको असहमतिका कारण गत २३ असोजमा पार्टी परित्याग गरेर भुसालले मंसिर ४ को निर्वाचनमा रूपन्देही–१ बाट स्वतन्त्र उम्मेदवारी दिएका थिए । उनलाई कांग्रेस, माओवादी केन्द्र, समाजवादीलगायत तत्कालीन सत्तागठबन्धनले सघाए पनि एमालेका छविलाल विश्वकर्मासँग पराजित भएका थिए ।