काठमाडौं । एमाले परित्याग गरेका नेता घनश्याम भुसाल नेकपा (एकीकृत समाजवादी) प्रवेश गरेका छन् ।

शुक्रबार काठमाडौंमा पत्रकार सम्मेलन गर्दै उनले पार्टी प्रवेश गरेको घोषणा गरे । कार्यक्रममा भुसालले पूर्वअध्यक्ष केपी ओलीलाई ओलीवादकै आडमा संवैधानिक सर्वोच्चता र जनताको बहुदलीय जनवादलाई ध्वस्त बनाएको आरोप लगाएका छन् ।

‘ओलीवाद, ओली विचार र ओली संगठनसँगको विचाराधारात्मक संघर्षपछि मैले नेकपा एसमा आफ्नो सदस्यता नवीकरण गरेको हुँ । एमालेमा संगठन कस्तो हुन्छ भन्दा सौराहा काण्ड देखिएकै हो । सिद्धान्त के हो भन्दा राज्य र पार्टी सबै मेरा चाकर हुन् । विचार के हो भन्दा सर्वत्र म । ज्ञान, विज्ञान र तर्कमाथि ओलीवाद हाबी भएका कारण कम्युनिस्ट आन्दोलन अप्ठेरोमा परेको हो’, ओलीामथि भुसालले आरोप लगाए ।

अब ओलीवादले धराशायी बनाएको कम्युनिष्ट आन्दोलन समाजवादीले नै अघि बढाउँने उनको तर्क छ । त्यस्तै भुसालले एकीकृत कम्युनिस्ट पार्टी र नेकपाको असली विरासत माधव नेपाल नेतृत्वको एकीकृत समाजवादीमा रहेको दाबी गरे।

मंसिर ४ मा भएको प्रतिनिधिसभा सदस्य निर्वाचनमा ओलीले टिकट नदिएपछि उनले २२ असोजमा एमाले परित्याग गरेका थिए । गठबन्धनको सहयोगमा रुपन्देही–१ बाट उम्मेदवार बनेका उनी एमाले सचिव छविलाल विश्वकर्मासँग पराजित भएका थिए ।