काठमाडौं । नेपाल नागरिक उड्डयन प्राधिकरणले हाल सञ्चालनमा रहेका कुनै पनि एटिआर जहाजमा त्रुटि नभेटिएको जनाएको छ ।

प्राधिकरणले आज विज्ञप्ती जारी गर्दै नेपालमा सञ्चालित सबै एटिआर ४२ तथा एटिआर ७२ जहाजको प्राविधिक परीक्षण गर्ने कार्य सकिएको जनाएको छ । परीक्षणको क्रममा ती जहाजहरुमा कुनै पनि प्राविधिक त्रुटि फेला नपरेको प्राधिकरणले जनाएको हो ।

आइतबार पोखरामा यती एयरलाइन्सको एटिआर ७२ जहाज दुर्घटनामा परेसँगै सरकारले सबै वायुयानको प्राविधिक परीक्षण गर्न प्राधिकरणलाई निर्देशन दिएको थियो ।

योसँगै प्राधिकरणले जहाजको उडान योग्यताको लागि दैनिक, उडान पूर्व र निश्चित अन्तरालमा गरिने मर्मतका काम अन्तर्राष्ट्रिय नागरिक उड्डयन संगठन(आइकेओ) को मापदण्डअनुसार हुने गरेको जनाएको छ ।