काठमाडौं । माओवादी केन्द्रका अध्यक्ष पुष्पकमल दाहाल प्रधानमन्त्री बनेको तीन सातापछि सत्तासाझेदार दलले मन्त्रालयको भागबण्डा टुंग्याएका छन् । सोमबार मन्त्रालयको बागबण्डा टुंग्याएका दलले मंगलबार आफ्नो भागमा परेको मन्त्रालयमा मन्त्री पठाउँदैछन् ।

प्रधानमन्त्रीको सचिवालयले दलहरूबीच मन्त्रालयको भागबण्डा टुंगिएकाले मंगलबार मन्त्रिपरिषद् विस्तार हुने जानकारी दिएको छ ।

बाँडफाँटअनुसार एमालेले परराष्ट्र, स्वास्थ्य, रक्षा, कृषि, भूमि व्यवस्था र महिला मन्त्रालय लिने समझदारी छ । एमालेले यसअघि अर्थ मन्त्रालय लिइसकेको छ ।

माओवादीले सञ्चार, संघीय मामिला र पर्यटन मन्त्रालय पाएको छ । यसअघि नै माओवादीका नारायणकाजी श्रेष्ठले भौतिक योजना मन्त्रालयको जिम्मेवारी सम्हालिसकेका छन् ।

रास्वपाले शिक्षा र श्रम मन्त्रालय पाएको छ । रास्वपाले गृह मन्त्रालयको जिम्मा लिइसकेको छ । राप्रपाले उपप्रधानमन्त्रीसहित ऊर्जा, सहरी विकास र खेलकुद मन्त्रालय पाएको छ ।

जनमतलाई उद्योग, वाणिज्य तथा आपूर्ति मन्त्रालय परेको छ । जसपा र नागरिक उन्मुक्तिका लागि वन, कानुन र खानेपानी मन्त्रालय छुट्याइएको छ ।