NepalWatch

News Portal For Eeverything In Nepal from Nepal

२०८० चैत १५ गते

मान्छे कुटेर ट्याक्टरमा आगो लगाउने कैलालीका सांसद चौधरीलाई तत्काल पक्राउ गर्न माग

काठमाडौं । नागरिक उन्मुक्ति पार्टीका प्रतिनिधिसभा सांसद अरुण चौधरीलाई तत्काल पक्राउ गर्न पत्राचार भएको छ । कैलाली क्षेत्र नम्बर २ बाट निर्वाचित सांसद चौधरीलाई पक्राउ गर्न गृह मन्त्रालयमा पत्राचार भएको हो ।

उनलाई कैलाली जिल्ला अदालतले २०७० बैशाख ९ गते आगो लगायो मुद्दामा दोषी ठहर गरेको थियो ।

उक्त घटनामा दोषी ठहर गर्दै चौधरीलाई अदालतले ६ महिनाको कैद सजायसहित आठ लाख १९ हजार २३ रूपैयाँ जरिवानाको सजाय सुनाएको थियो ।

यो दुवै सजाय भुक्तानी नगरी प्रतिनिधिसभा सांसद निर्वाचित उनलाई तत्काल पक्राउ गर्न गृहमा पत्राचार भएको हो ।

उनलाई तत्काल पक्राउ गरी यसको जानकारी प्रतिनिधिसभा संसद सचिवालयलाई पनि उपलब्ध गराई प्रहरी महानिरिक्षकलाई निर्देशन दिन गृह सचिवलाई आग्रह गरिएको छ ।

सांसद चौधरीले ढुंगा लिन चिसापानीस्थित गोरांगा खोलाबाट ढुंगा लोड गरी लम्कीतर्फ आउँदै गरेका चालक साजन चौधरीलाई ८/१० जनासहित कुटपिट गरी ट्याक्टरमा आगो लगाइ आठ लाख ७५ हजार रूपैयाँको क्षति पुर्याएको भन्दै मुद्दा परेको थियो ।