काठमाडौं । काठमाडौं महानगरपालिकाले दमकल नछिर्ने आफ्नो क्षेत्रभित्र आगो निभाउन फायर हाइड्रन्ट जडान कार्य सुरु गरेको छ ।

महानगरपालिकाले काठमाडौंको कोर एरिया भनेर चिनिने निकै साँघुरा गल्ली भएका असन, इन्द्रचोकलगायत क्षेत्रमा यसको जडान कार्य सुरु गरेको हो ।

काठमाडौं महानगरपालिकाका प्रमुख (मेयर) बालेन शाहले सामाजिक सञ्जालमार्फत हाइड्रन्ट जडानको काम सुरु भएको जनाएका छन् ।

हाइड्रन्ट दमकल पस्न नसक्ने स्थानमा आगो निभाउने प्रविधि हो । यसमा पाइप जोडेर आगो लागेको स्थानमा पानी फ्याँक्न सकिन्छ ।

काठमाडौंका साँघुरा गल्ती भएका स्थानमा हुने आगलागी टाउको दुखाइको विषय बन्दै आएको छ । यो प्रविधि जडान भएपछि महानगरपालिका क्षेत्रको आगो नियन्त्रणमा सहजता हुने विश्वास महानगरपालिकाले लिएको छ ।