काठमाडौं । महाधिवेशन भएको १३ महिनापछि नेकपा माओवादी केन्द्रको केन्द्रीय समितिले पूर्णता पाएको छ । माघ १२–२१ गते सम्म बसेको माओवादीको स्थायी समिति बैठकले नेताहरूको वरीयता निर्धारणसहित केन्द्रीय समितिलाई पूर्णता दिएको सचिव गणेश साहले जानकारी दिए ।

साहका अनुसार २२ सदस्यीय पदाधिकारी, ४४ सदस्यीय स्थायी समिति तथा ३८६ सदस्यीय केन्द्रीय समितिले पूर्णता पाएको हो । यसैगरी वैकल्पिक केन्द्रीय समिति २०२ सदस्य बनाइएको छ ।

२२ जना पदाधिकारी रहेको माओवादी केन्द्रमा महिलाको प्रतिनिधित्व जम्मा एक जाना रहेका छन् । पुरूष २१ जना छन् । तीमध्ये खसआर्यको प्रतिनिधित्व १६ जना रहेका छन् । जनजातिबाट ४ जना र मधेशीबाट २ जनाको प्रतिनिधित्व रहेको छ । दलित समुदायबाट कुनै पनि पदाधिकारी बन्न सकेका छैनन् ।

बैठकले पूर्वसभामुख अग्नि सापकोटा र पम्फा भुसाललाई उपाध्यक्षमा मनोनीत पनि गरेको छ । यसअघि उपमहासचिव रहेकी भुसाल उपाध्यक्षमा बढुवा भएकी हुन् । पहिलेकै वरीयतालाई यसपटक पनि निरन्तरता दिएको साहले बताए । अध्यक्षमा पुष्पकमल दाहाल र वरिष्ठ उपाध्यक्ष नारायणकाजी श्रेष्ठ रहेका छन् । उपाध्यक्षमा कृष्णबहादुर महरा, सापकोटा र भुसाल रहेका छन् । महासचिवमा देवप्रसाद गुरुङ छन् ।

यसैगरी ६ जना उपमहासचिवमा गिरिराजमणि पोखरेल, वर्षमान पुन, हरिबोल गजुरेल, जनार्दन शर्मा, शक्तिबहादुर बस्नेत र मात्रिका यादव रहेका छन् ।त्यस्तै ९ जना सचिवमा दीनानाथ शर्मा, चक्रपाणि खनाल, देवेन्द्र पौडेल, लिलामणि पौडेल, गणेश साह र हितमान शाक्य रहेका छन् । यसैगरी हितराज पाण्डे, डिलराज आचार्य र सुरेन्द्र कार्की सचिव भएका छन् । कोषाध्यक्षमा श्रीराम ढकाल रहेका छन् । माओवादीको आठौं महाधिवेशन गतवर्ष ११–१८ सम्म काठमाडौंमा भएको थियो ।

त्यस्तै बैठकले मातहतका समितिलाई १३ बुँदे सर्कुलर जारी गर्दै पार्टी एकताका लागि विचार मिल्ने वामपन्थी शक्तिसँग वार्ता र छलफल गर्ने देखि संगठन विस्तारको अभियान चलाउने सम्मका निर्णय लिएको छ ।