काठमाडौं (एजेन्सी) । विनाशकारी भूकम्पबाट पीडितको सहायताका लागि विभिन्न देशले टर्कीलाई सहायता गरिरहेका छन् । कतिपय देशबाट उद्धार टोली नै त्यहाँ पुगेर सहयोग गरिरहेका छन् ।

तर आपराधिक मानसिकता भएका समूह भने संवेदनशीलता बिर्सिएर मौकाको फाइदा उठाउन सक्रिय बनेका छन् ।

यसक्रममा शनिबार टर्कीमा रहेको जर्मन उद्धार टोली तथा अस्ट्रियाली सेनासँग अज्ञात समूहको झडप भएको छ । झडपपछि जर्मन उद्धार टोली र अस्ट्रियाली सेनाले आफ्नो उद्धार कार्य स्थगन गरेका छन् ।

लुटपाटको आरोपमा करिब ५० जनालाई पक्राउ गरिएको छ । उनीहरूबाट धेरै हतियार समेत बरामद भएको बिबिसीले लेखेको छ ।

टर्कीका राष्ट्रपतिले कानुन उल्लंघन गर्नेलाई सजाय दिन आफ्नो आपतकालीन शक्ति प्रयोग गर्ने बताएका छन् । यसैबीच, उद्धारकर्मीले खाद्यान्न आपूर्तिमा कमी आएका कारण सुरक्षा अवस्था बिग्रने अनुमान गरेका छन् ।