काठमाडौं । गएराति आफ्नै निवासमा ग्यास बिस्फोटमा परी जलेर घाइते भएका कांग्रेसका नेता तथा सांसद चन्द्र भण्डारीलाई थप उपचारका लागि भारतको मुम्बई लगिएको छ ।

भण्डारीको स्वास्थ्य अवस्था गम्भीर भएकाले मुम्बईको सुविधासम्पन्न नेशनल बर्नस सेन्टरमा लगिएको उनको सचिवालयले जनाएको छ । सचिवालयका अनुसार भण्डारीलाई अस्पतालबाट त्रिभुवन विमानस्थलसम्म एम्बुलेन्समा लगिएको थियो ।

विभानस्थलबाट एयर एम्बुलेन्सको रूपमा श्री एयरलायन्स विमानबाट मुम्बई लगिएको हो । उनको स्वासप्रश्वास नली सुन्निन थालेको कारण जटिलता थपिएको हो । स्वास्थ्य समस्यामा थप जटिलता नहोस् भनेर उनका साथमा ६ जना चिकित्सकको टीम सँगै गएका छन् ।

चिकित्सकका अनुसार भण्डारीको शरीरको ३० प्रतिशत भाग जलेको छ । दुवै हात, दुवै गोडा र अनुहार जलेको छ । उनकी आमा हरिकलाको बिहान उपचारकै क्रममा निधन भएको छ ।