टर्कीमा फेरि गयो शक्तिशाली भूकम्प
काठमाडौं । टर्कीमा सोमबार फेरि भूकम्प गएको छ । पछिल्लो भूकम्पमा तीन जनाको मृत्यु भएको छ भने ६८० भन्दा बढी घाइते भएका छन् ।
बिबिसीले ६.४ म्याग्निच्युडको भूकम्प गएको र यसको महसुस सिरिया र टर्की दुवै देशमा परेको जनाएको छ ।
टर्कीको प्रकोप तथा आपतकालिन एजेन्सी अफादले स्थानीय समय अनुसार साँझ ८ः४४ मा भूकम्प गएको जनाएको छ ।
यो भूकम्प आएपछि दर्जनौं पटक परकम्प महसुस गरिएको थियो ।
यसअघि फेब्रुअरी ६ मा गएको भूकम्पमा ४४ हजारभन्दा बढीले ज्यान गुमाएका थिए । राहत कार्यकर्ताहरू अझै पनि स्थिति सामान्यमा ल्याउन प्रयासरत छन्।
सोमबारको भूकम्पमा परी मृत्यु हुनेहरु अन्टाक्या, दाफ्ने र समन्दगीका बासिन्दा थिए ।
सरकारले जोखिमयुक्त भवनबाट बाहिर निस्कन सर्वसाधारणलाई अपिल गरेको छ ।
अन्टाक्याका मेयरले यस भूकम्पका कारण अझै केही व्यक्ति भग्नावशेषमा फसेको हुनसक्ने बताए ।
टर्की प्रशासनले फेब्रुअरी ६ मा गएको शक्तिशाली भूकम्पपछि ६ हजार परकम्पन महसुस गरेको जनाएको छ ।
प्रतिक्रिया