काठमाडौं । नेपाली कांग्रेसका सभापति शेरबहादुर देउवाले आसन्न राष्ट्रपति निर्वाचनमा आफ्नो दलका उम्मेदवारलाई सहयोग गर्न एमाले अध्यक्ष केपी शर्मा ओलीलाई आग्रह गरेका छन् ।

देउवाले ओलीलाई एक पत्र लेख्दै आफ्ना उम्मेदवारलाई मत दिन आग्रह गरेका हुन् ।

नेपाली कांग्रेसका मुख्य सचिव कृष्णप्रसाद पौडेलले राष्ट्रपति निर्वाचनका आफ्ना उम्मेदवारका लागि पार्टी सभापति देउवाले ओलीसँग मत मागेको जानकारी दिए । उनका अनुसार, मत माग्दै लेखिएको पत्र सोमबार नै ओलीलाई बुझाइएको छ ।

यही फागुन २५ गते हुन लागेको राष्ट्रपति निर्वाचनमा रामचन्द्र पौडेलसँगै एमालेका सुवासचन्द्र नेम्वाङ प्रतिस्पर्धामा छन् ।

यसअघि ओलीले पनि कांग्रेसबाहेकका दललाई पत्र लेखेर यसैगरी मत मागेका थिए ।