NepalWatch

News Portal For Eeverything In Nepal from Nepal

२०८१ वैशाख २ गते

म्यादीको पोसाकमा आइजी र डिआइजी मिलेर भ्रष्टाचार गरेको आरोप

छानविन नभए राष्ट्रपति कार्यालय जाने

काठमाडौं । गत ४ मंसिरमा सम्पन्न प्रतिनिधि तथा प्रदेश सभा निर्वाचनमा भर्ना लिइएको एक लाख १५ हजार म्यादी प्रहरीको पोसाकमा भ्रष्टाचार भएको आरोपमा गृह मन्त्रालयमा उजुरी परेको छ ।

प्रहरी प्रधान कार्यालय नक्सालका डिआइजी दीपक थापासहित प्रहरी महानिरिक्षक धिरज प्रताप सिंहसमेतको मिलेमतोमा भ्रष्टाचार भएको आरोपमा उजुरी परेको हो ।

उक्त उजुरीमा उल्लेख भएअनुसार प्रत्येक म्यादीको जुत्ता कपडा र ज्याकेटमा रू १९०० खर्च भएको थियो । पोसाक खरिदवापत १६ करोडको भ्रष्टाचार भएको आरोप लगाइएको छ ।

प्राप्त उजुरीका अनुसार प्रत्येक म्यदी प्रहरीको कपडा, जुत्ता र ज्याकेट खरिदमा देशभरका जिल्ला प्रहरी कार्यालयमा झुठा टेन्डर आह्वान गरिएको थियो । जसको नेतृत्व प्रहरी प्रधान कार्यालय नक्सालका डिआइजी थापाले गरेको उक्त निदेवनमा उल्लेख छ ।

यससम्बन्धी छानविन अघि नबढेमा राष्ट्रपति कार्यालयमा पत्राचार गरिनेसमेत चेतावनी दिइएको छ ।

गृह मन्त्रालयका प्रवक्ता जितेन्द्र बस्नेतले यसबारे छानविन गरेर प्रहरी प्रधान कार्यालयलाई पठाएको पत्रमा जवाफ आइसकेको बताए ।

‘प्राप्त गुनासोका आधारमा हामीले प्रहरी कार्यालयलाई चिठी पठाएका थियौं । त्यसको जवाफ आइसकेको छ,’ उनले भने, ‘जवाफमा प्रहरी कार्यालयले लाइन मिनिस्ट्रि बजेट इन्फर्मेसन सिस्टमबाटै रकम पठाएको दाबी गरेको छ ।’ प्रहरी कार्यालयबाट आएको जवाफमा थप के गर्ने भन्ने विषयमा सम्बन्धित शाखाले अध्ययन गरिरहेको उनको भनाई छ ।