काठमाडौं । इंग्लिस क्लब म्यानचेस्टर सिटीले च्याम्पियन्स लिग फुटबलको क्वाटरफाइनल यात्रा तय गरेको छ ।

राउण्ड अफ १६ अन्तर्गत गएराति सम्पन्न दोस्रो लेगमा जर्मन क्लब आरबी लाइपजिगलाई ७–० को फराकिलो गोल अन्तरले हराउँदै सिटी विजयी बनेको हो । समग्रमा सिटीले ८–१ को जित निकाल्यो ।

योसँगै उसले अन्तिम आठको स्थान सुनिश्चित गरेको छ ।

सिटीको जितमा अर्लिङ हालाण्ड एक्लैले ५ गोलको योगदान दिए । त्यसैगरी, इल्के गुन्डोगान र केभिन डी ब्रुएनले पनि समान एक÷एक गोल गरे ।

हालाण्डले पहिलो हाफमै ह्याट्रिक पूरा गरे । उनले २२ औं, २४ औं र पहिलो हाफको इन्जुरी समयमा गोल गरेका हुन् । दोस्रो हाफको ५३ औं र ५७ औं मिनेटमा थप गोल गर्दै उनले सिटीको अग्रतालाई थप फराकिलो पारे ।

४९ औं मिनेटमा गुन्डोगान र इन्जुरी समयमा ब्रुएनले थप गोल गर्दै सिटीलाई ७–० का फराकिलो जित दिलाए ।

योसँगै हालाण्ड च्याम्पियन्स लिगको एउटै खेलमा पाँच गोल गर्ने सबैभन्दा कान्छो खेलाडी बनेका छन् । हालाण्डको उमेर अहिले मात्र २२ वर्ष छ । युरोपको एलिट क्लब प्रतियोगितामा सबैभन्दा छिटो ३० गोल गर्ने अर्को रेकर्ड पनि उनको नाममा दर्ता भएको छ ।