काठमाडौं । लुम्बिनी प्रदेशका मुख्यमन्त्री लिला गिरिलाई प्रदेश सभाबाट विश्वासको मत लिने समय नै नदिइ गठबन्धनका तर्फबाट कांग्रेस संसदीय दलका नेता डिल्लीबहादुर चौधरीले मुख्यमन्त्रीमा दाबी पेश गरेका छन् ।

आइतबार तत्कालीन सत्ता साझेदार दल माओवादी केन्द्रसहित ६ दलले सरकारलाई दिएको समर्थन फिर्ता लिन नपाउँदै महतले प्रदेश प्रमुख अमिक शेरचनसमक्ष निवेदन पेश गरेका हुन् ।

संविधानको धारा १६८ को उपधारा २ अनुसार दुईभन्दा बढी दलको समर्थन जुटाएर चौधरीले आइतबार मुख्यमन्त्री दाबी गरेको माओवादी संसदीय दलको नेता जोगबहादुर महराले जानकारी दिए ।

उनलाई मुख्यमन्त्री बनाउन कांग्रेस, माओवादीसहित ९ दलका ५३ जना सांसदले हस्ताक्षर गरेका छन् । सरकारमा सहभागी दल विभाजन भएमा वा सरकारलाई समर्थन गर्ने दल विभाजित भएमा मुख्यमन्त्रीले तीन दिनभित्र विश्वासको मत लिनुपर्ने संविधानमा उल्लेख छ । तर सत्ता साझेदार दलले सरकारलाई समर्थन फिर्ता लिन नपाउँदै कांग्रेसले सरकारमा जान अस्वभाविक हतारो देखाएको छ ।