काठमाडौं । प्रधानमन्त्रीनिवास बालुवाटारमा अहिले सत्तागठबन्धनको बैठक बसिरहेको छ ।

सत्तासाझेदार दलबीच मन्त्रालय भागबण्डा मिलाउन लगातार संवादमा रहेका नेताहरू यसलाई टुंग्याउन आज पनि बैठकमा बसेका हुन् ।

प्रधानमन्त्री प्रचण्डको सचिवालयले मन्त्रालय भागबण्डा र सरकारको साझा नीति तथा कार्यक्रमबारे छलफल गर्न सत्तागठबन्धनमा सामेल दलका शीर्ष नेताबीच अहिले छलफल चलिरहेको जनाएको छ ।

राष्ट्रपति निर्वाचनमा एमाले, राप्रपालगायत दल सम्मिलित गठबन्धन बदलेर पुरानो गठबन्धन ब्युँताएका प्रचण्ड यसमा आबद्ध दललाई सहभागी गराएर आफू नेतृत्वको सरकारलाई पूर्णता दिन चाहिरहेका छन् । तर दलहरूबीच अझैसम्म मन्त्रालयको भागबण्डामा ठोस सहमति जुट्न सकेको छैन ।