काठमाडौं । प्रधानमन्त्री पुष्पकमल दाहाल प्रचण्डले आफू नेतृत्वको सरकार ५ वर्ष टिक्ने दाबी गरेका छन् ।

बुधबारदेखि काठमाडौं महानगरपालिकाको आयोजनामा सुरू भएको न्यायिक समितिको पहिलो राष्ट्रिय सम्मेलनलाई सम्बोधन गर्दै उनले वर्तमान सरकर पुरै कार्यकाल टिक्ने दाबी गरेका हुन् ।

‘स्थानीय तहको निर्वाचन सम्पन्न भएदेखि संघ र प्रदेशको निर्वाचन भयो । त्यसपछि मेरै नेतृत्वमा सरकार छ । आगामी पाँच वर्षसम्म पनि आफू नेतृत्वकै सरकारले निरन्तरता पाउने विश्वास मलाई छ ।’

सम्मेलनमा मेयर बालेन शाहले सरकार टिकिरहे स्थानीय तहलाई पनि काम गर्न सजिलो हुने बताएका थिए । मेयर शाहको जवाफ फर्काउँदै उनले पाँच वर्षसम्म वर्तमान सरकारले नै निरन्तरता पाउनेमा ढुक्क हुन आग्रह गरे ।

राष्ट्रपतिको निर्वाचनमा एमालेसँगको सत्ता समीकरण बदलिएपछि कांग्रेससँग साढे दुई वर्ष काम गर्ने गरी सहमति गरेका प्रचण्डले मंगलबार पाँचै वर्ष चलाउने खुलासा गरेका हुन् ।