काठमाडौं । भारतको सिक्किममा गएको हिमपहिरोमा परी तीन जना नेपालीको मृत्यु भएको छ भने तीन जना घाइते छन् ।

मंगलबार दिउँसो सिक्किमको गान्तोक–नाथुला सडकमा गएको भीषण हिमपहिरोमा परी सात जनाको मृत्यु भएको थियो । जसमध्ये तीन नेपाली रहेको खुलेको छ ।

सिक्किम सरकारले एक विज्ञप्ति जारी गर्दै तीन नेपालीको मृत्यु भएको जनाएको छ । मृत्यु हुनेमा चितवनका शिवप्रसाद लामिछाने र आशिका ढकाल तथा रूपन्देहीकी मुना शाह श्रेष्ठ छन् ।

सोही घटनामा थप तीन नेपाली घाइते भएका छन् ।  घाइते हुनेमा गीता सापकोटा, ज्योति गुरुङ र रमेश खनाल छन् । उनीहरूको अहिले उपचार भइरहेको सिक्किम सरकारद्वारा जारी विज्ञप्तिमा उल्लेख छ ।

उनीहरू घुम्ने प्रयोजनका लागि नेपालबाट त्यहाँ गएका थिए ।