काठमाडौं । इरानमा हिजाब लगाउने महिलामाथि निगरानी गर्न सार्वजनिक स्थानमा क्यामेरा जडान गरिएको छ ।

इरानमा महिलाले हिजाब लगाउनुपर्ने कानून छ । यस्तो कानूनलाई लिएर त्यहाँभित्र विरोधका स्वर बढिरहेका बेला यस्तो कदम चालिएको हो ।

इरानी प्रहरीले यसबारे सार्वजनिक गर्दै जुन महिलाले कपाल छोप्दैनन् उनीहरूलाई म्यासेजमार्फत चेतावनी दिइने जनाएको छ ।

यस्तो कदमले ‘हिजाब कानूनविरुद्धको विरोध’ रोक्न मद्दत गर्ने प्रहरीको भनाइ छ ।

गत वर्ष हिजाब नलगाएको आरोपमा पक्राउ परेकी महसा अमिनीको प्रहरी हिरासतमा मृत्यु भएपछि देशैभर हिजाबविरुद्ध  विरोध प्रदर्शन हुँदै आएको छ । जसको प्रभाव अन्य देशहरूमा पनि परेको छ ।

सन् १९७९ मा सम्पन्न इरानी क्रान्तिपछि देशमा धार्मिक कानूनलाई कडाइका साथ लागू गरिएको छ । यसअन्तर्गत महिलाहरूले हिजाब लगाउन अनिवार्य गर्दै उल्लंघन गरिएको अवस्थामा जरिवानालगायत अन्य सजाय हुने व्यवस्था छ ।