काठमाडौं । रास्वपाका सभापति रवि लामेछानेले कान्तिपुर दैनिकमा बिहीबार प्रकाशित ‘रविको फास्ट ट्रयाक : ७ दिने बोलपत्र गरेर ठेक्का’ शीर्षकको समाचारप्रति गम्भीर असहमति जनाएका छन् ।

सामाजिक सञ्जाल फेसबुकमा लामो ‘स्टाटस’ राख्दै उक्त समाचारको खण्डन गरेका हुन् । समाचारमा उल्लेख भएजस्तो आफूले कानुनविपरीत कुनै गल्ती नगरेको उनले दाबी गरे ।  उनले समाचारमा उल्लेख गरिएको कार्यविधि गृहमन्त्रालयको कार्यभार सम्हाल्नुअघि नै मन्त्रालयमा तयार भएर तर्जुमाका लागि पेश भएको उनको दाबी छ ।

समाचारमा राष्ट्रिय परिचय पत्रको वैयक्तिक र जैविक विवरण रुजु गर्ने जिम्मा विदेशी कम्पनीको नेपाली एजेन्टलाई दिएको भनेर उक्त कम्पनीलाई आफू गृहमन्त्री हुँदा मात्रै भित्र्याइएको जसरी प्रचार गरिएकोप्रति उनले असन्तुष्टी जनाएका छन् । ‘यो समाचारपछि मैले मेरो टिमलाई खोज्न लगाउँदा ‘एडभान्टेज इन्टरन्यासनल’ नामको यो कम्पनीले राष्ट्रिय परिचयपत्र तथा पञ्जीकरण विभागमा कयौँ ठेक्काहरू अघिल्लो गृहमन्त्रीको कार्यकालमै पाएको देखिन्छ’, विज्ञप्तिमा उल्लेख छ ।

प्रकाशित समाचारको खण्डन गर्दै उनले केही विवरण प्रस्तुत गरेका छन् । साथै उपनिर्वाचनको मुखमा उम्मेदवार विशेषलाई लक्षित गरी भ्रामक सूचना सम्प्रेषण गर्ने प्रयास भएको भन्दै मतदाताले उक्त कुरा राम्रैसँग बुझ्ने उल्लेख गरेका छन् ।