काठमाडौं । पाटन स्वास्थ्य विज्ञान प्रतिष्ठानमा एक जना चिकित्सकले ४० देखि ५० जना बिरामी परीक्षण गर्नुपर्ने बाध्यताले सेवा लिन ३ देखि ४ घण्टासम्म कुर्नुपर्ने अवस्था आएको छ ।

महालेखा परीक्षकको ६० औं वार्षिक प्रतिवेदनले अस्पतालमा दैनिक औसत एक हजार सात सयसम्म बिरामीको चाप रहेकोले एक जना चिकित्सकले ४० देखि ५० जना बिरामी परीक्षण गर्नुपर्दा सेवा लिन बिरामीले ३ देखि ४ घण्टा प्रतीक्षा गर्नुपर्ने अवस्था रहेको उल्लेख गरेको छ ।

त्यस्तै, अस्पतालमा दूरबिनको सहायताले गरिने शल्यक्रियाको लागि २ महिना, यूरो सर्जन गर्न ४ हप्ता, नाक, कान, घाँटीको शल्यक्रिया गर्न १२ हप्ता , नयाँ हेमोडाईलासिस सेवाका लागि ४ देखि ५ महिना कुर्नुपर्ने अवस्था छ । अस्पतालमा मेसिनरी उपकरणको अभावले डेन्टल इम्प्लान्ट, थेरासिस उपचार, कार्डियाक भाष्कुलर सेवा, आँखाको लेजर, रेटिना केयर लगायतका सेवासमेतउपलब्ध हुन सकेको छैन ।