काठमाडाैं । अख्तियार दुरूपयोग अनुसन्धान आयोगले यातायात व्यवस्था कार्यालयका तत्कालीन उपसचिव सुन्दर भट्टराईविरूद्ध मुद्दा दायर गरेको छ ।

अख्तियारले यातायात व्यवस्था कार्यालय काठमाडौं, सुकेधारास्थित भट्टराईविरूद्ध १ करोड १५ लाख २९ हजार रूपैयाँ बराबरको बिगोसहित आज विशेष अदालत, काठमाडौंमा मुद्दा दायर गरेको हो ।

भट्टराईले गैरकानूनी रूपमा सम्पत्ति आर्जन गरेको भन्ने उजुरी निवेदन सम्बन्धमा अनुसन्धान हुँदा सो पुष्टि हुन आएकाले उनीविरूद्ध मुद्दा दायर गरेको अख्तियारले जनाएको छ ।

उनलाइ भ्रष्टाचार निवारण ऐन, २०१७ को दफा १५ मा उल्लेख भए बमोजिम सोही ऐनको दफा ३ तथा दफा २९ को उपदफा (२) को प्रतिबन्धात्मक वाक्यांश तथा प्रचलित भ्रष्टाचार निवारण ऐन, २०५९ को दफा २० को उपदफा (२) बमोजिमको कैद तथा जरिवानाको सजाय हुन मागदाबीसहित मुद्दा दायर गरेको छ ।