काठमाडौं । विश्वकै सबैभन्दा अग्लो हिमाल सगरमाथा आरोहणमा विश्व र्कीतिमान राख्ने होडबाजीमा कामिरिता शेर्पा र पासाङ दावा शेर्पा रहेका छन् । जेठ ३ गते २७ औं पटक सगरमाथा चुचुरोमा पुगेर यसअघिको आफ्नै ‘रेकर्ड ब्रेक’ गरेका कामिरिता एक साता नपुग्दै मंगलबार दोस्रोपटक चुचुरोमा पुगे ।

२७ औं विश्वर्कीतिमान सोमबार सोलुखुम्बुका पासाङ दावा शेर्पाले बराबरीमा कायम गरेपछि उनी फेरी सगरमाथा आरोहण गरेका हुन् । उनी आवद्ध सेभेन समिट ट्रेक्स प्रालिले दिएको जानकारी अनुसार, कामीरिता मंगलबार बिहान ९ बजेर २० मिनेटमा सगरमाथाको चुचुरोमा पुगेका थिए ।

खुम्बु पासाङल्हामु गाउपालिकाको थामेमा जन्मेका ५३ वर्षीय कामिरिताको नाममा ८ हजार मिटर अग्ला शिखरमा सबैभन्दा बढी आरोहण गरेको कीर्तिमान समेत रहेको छ । उनले चो ओयु, मनास्लु, ल्होत्से, केटु गरी ४० पटक विश्वका अग्ला हिमालहरूको आरोहण गरिसकेका छन् । सन् १९९४ मे १३ मा पहिलो पटक उनले सगरमाथा चुचुरो चुमेका थिए ।

यसअघि उनले तीन सिजनमा दुई–दुई पटक सगरमाथा आरोहण गरिसकेका छन् । कामेरिताले सन् २००९, २०१० र २०१३ मा एकै सिजनमा दुई पटक सगरमाथा चढेका थिए । यसअघि २०१९ मा पनि उनले एक हप्तभित्रमा २ पटक सगरमाथा आरोहण गरी विश्वर्कीतिमान कायम राखेका थिए । सन् २०२१ र २०२२ मा पनि सगरमाथाको चुचुरोमा पुगेका थिए ।

यसैगरी सन् १९९८ मा पहिलो पटक सगरमाथाको चुचुरोमा पुगेका पासाङले त्यसयताका २७ पटक सगरमाथा चढेर कामेरितासँग बराबरी कीर्तिमान कायम गरेका हुन् । उनले सन् २००६, २००७, २०१०, २०१३, २०१८, २०१९ र २०२२ मा एकै सिजनमा दुई पटक सगरमाथाको चुचुरोमा पाइला राखेका थिए ।