काठमाडौं । प्रधानमन्त्री पुष्पकमल दाहाल प्रचण्डले पशुपतिनाथको जलहरीमा प्रमुख प्रतिपक्षी दलका नेता एवं पूर्वप्रधानमन्त्री केपी शर्मा ओलीलाई जोड्नु गलत भएको बताएका छन् ।

आफ्ना पार्टीका सांसद लेखनाथ (राजन) दाहालले जेठ १० गतेको बैठकमा दिएको अभिव्यक्तिलाई लिएर एमालेले तीव्र असन्तुष्टि व्यक्त गरिरहेका बेला प्रचण्डले आफ्ना सांसदको अभिव्यक्ति गलत भएको ठहर गर्दै ओलीको बचाउ गरेका हुन् ।

शनिबार प्रतिनिधिसभा बैठकमा  समय लिएर बोल्दै प्रधानमन्त्री प्रचण्डले भने, पशुपतिमा जलहरी लगाउने काम पशुपति क्षेत्र विकास कोषको हो । यसमा भएको अनियमिततामा केपी ओलीज्यूलाई जोड्नु उचित हुँदैन ।’

पशुपतिमा लगाइएको जलहरीमा भएको अनियमिततामा अख्तियार दुरूपयोग अनुसन्धान आयोगले अनुसन्धान गरिरहेको उल्लेख गर्दै उनले यसमा सरकारले सहयोग गर्ने प्रतिबद्धता जनाए ।

माओवादी केन्द्रका सांसद दाहालले जेठ १० मा केपी शर्मा ओली नेतृत्वको सरकारको पालामा यती, ओम्नीसँगै पशुपतिनाथको जलहरी राख्नेक्रममा समेत भ्रष्टाचार गरिएको आरोप लगाएपछि एमालेले बिना प्रमाण आक्षेपित गरिएको भन्दै शुक्रबार संसद् बैठक अवरुद्ध पारेको थियो । शनिबार प्रधानमन्त्री प्रचण्ड, एमाले अध्यक्ष ओली र कांग्रेस सभापति शेरबहादुर देउवाबीच यसै विषयलाई लिएर छलफल भएको थियो । जसले माओवादी सांसदको आरोप गलत भएको निष्कर्ष निकाल्दै त्यसलाई संसदको रेकर्डबाट हटाउने र प्रधानमन्त्री प्रचण्डले यसबारे संसदमा स्पष्ट पार्ने सहमति भएको थियो । त्यसैअनुरूप प्रचण्डले संसदमा ओलीको बचाउ गरेका हुन् ।