काठमाडौं । अर्जेन्टिनी लिजेन्ड फुटबलर लियोनल मेसी अमेरिकी क्लब इन्टर मियामीमा अनुबन्धित हुने पक्का भएको छ ।

पेरिस सेन्ट जर्मेन क्लब (पिएसजी) बाट बिदा लिएपछि मेसीलाई बार्सिलोनासँगै साउदी अरेबियाको क्लब अल हिलाललगायतबाट अफर आएको समाचार प्रकाशमा आएका थिए । योबीचमा उनी साउदी क्लबमा अनुबन्धित हुन लागेको हल्ला पनि चल्यो । तर ती सबैलाई गलत सावित गर्दै उनी अमेरिकन क्लबमा अनुबन्धित हुने निश्चित भएको हो ।

‘मैले मियामी जाने निर्णय लिएको छु,’ डिअरोयो स्पोर्टस र मन्डो डिपोर्टिभो अखबारसँगको कुराकानीका क्रममा मेसीले भनेका छन्, ‘मैले युरोप छाड्ने निर्णय गरेँ ।’

खासमा मेसी अन्य क्लबमा अनुबन्ध नभएर पुनः बार्सिलोना जान चाहन्थे । तर एउटा कारणले त्यो सम्भव हुन सकेन र उनी मियामीमा अनुबन्धित भए । मेसीका अनुसार, त्यसको कारण फाइनान्सियल फेयर प्ले हो ।

‘यो सत्य हो कि मलाई अर्को युरोपेली टोलीबाट अफर आएको थियो तर मैले यसबारे सोचेको पनि थिइनँ किनभने मेरो विचारमा युरोपमा जाने ठाउँ मात्र बार्सिलोना थियो।’

विश्वकपमा देशलाई जिताएपछि र बार्सा फर्कंने चाहना पूरा नभएपछि फरक तरिकाले एमएलएसमा जान उपयुक्त भएको पनि मेसीले उल्लेख गरेका छन् ।